بسم الله الرحمن الرحيم

بداية أتمنى لكم مشاهدة ممتعة لنهائيات ستاراك6 يوم غد وأتمنى أن تكون هذه الحلقة ذكرى جميلة تبقى لنا من ستاراك 6

شو رأيكم نبلش .... بسم الله ::

4 شهور مرت علينا من 20 شباط فبراير لليوم الخميس 11/6 عشناها يوم بيوم مع طلاب ما كنا منعرفهم ولا سمعانين فيهم فاتوا علينا من أوسع وأضخم أبواب الشهرة من برنامج ستار أكاديمي اللي بشاهدة الوطن العربي أنه الأول بمجاله وما اله منافس بالجمهور اللي بتابعه

مر الموسم السادس ما فيني قول بنجاح أو بفشل رح اترك هالشي للسطور التالية ولنقاشكم ورأيكم يحكم عليه

رح نناقش كل الجوانب ما رح نترك شي ولو أنا نسيت شي انتوا ذكروني بدي شوف ردود كتيرة ونقاشات كبيرة

_____________________________
المقدمة :: هيلدا خليفة :: صراحة أنا بحبها وبحب تقديمها بس تيابها لازمهم ترتيب أكتر لان البرنامج مشاهدته عاليه أنا برأيي لازم تلبس كل أسبوع من تصاميم المصممين اللبنانيين المشهورين بالعالم كله
__________________________
الأساتذة:

اليسار :: رائعة وتصميمها رائع والها خبرة كبيرة بالمجال

وديع :: ما بعرف ليش بحسه بيتقصد ما ينقي أغاني حلوة يعني في أغاني كتير ضاربة ومع هيك بيكرر الأغاني نفسها كل سنة .. وبتوزيع الاغاني مو عادل ومو كل الأحيان بتزبط معو

ميشيل فاضل :: هوي مساعد لوديع وبس... بس عزفه على البيانو كتير حلو بالمواسم السابقة كان دوره أكبر بالتوزيع والتلحين والتسجيل بالاستديو الي ما ستخدموه السنة

ماري :: راعئة هيي الأفضل والأفهم بينهم

ميشيل جبر :: أعتقد انه أقل أستاذ تمثيل خبرة ومهارة مر عالأكاديمية أفكاره مو حلوة وما بفهم شو بدو

فؤاد فاضل :: ممم ؟؟ ما اله داعي خخخ كلنا منتذكر كيف عمل مع محمد سراج وشو قال لناصر خخخخ واختيار النوميني تبعه مو مفهوم

جورج :: أنا بحبو كتير وهوي مدرب كتير ماهر بس السنة ما عجبني مفكر حالو بمنطقة عسكرية وبعدين وقت اللي بيجي يحكي مع النوميني كتير ممل وما بيساعدهم بالعكس بيمللهم وبيزيدها عليهم
________________________
مديرة الاكاديمية ::

رولا سعد ::ممم أنا كنت لحد هيك السنة بدافع عنها وبكل مكان بقول انها مصداقيتها كبيرة وبدافع عن لزوم استمرارها بالادارة بس السنة شوووو صار ؟؟

أنا ما رح احكي عن التصويت والغش لان هاد الشي أنا ما بعرف اذا صح أو لا

أنا تعليقي عليكي يا ست رولا ليش هيك عم تعملي صدقا وبدون مبالغة كانت تجيني لحظات أشعر فيها بانها عم تتقصد تخلي البرنامج يفشل لان كل شي بايدها هي وهي الملامة الوحيدة

ليش خلت صورة الطلاب تطلع احيانا على انهم منافقين

ليش ما استضافت نجوم كتير متل كل سنة ومن كل الجنسياتلك لولا أخر كم أسبوع كان البرنامج رح يقتصر على ضيفة عربية وحدة والباقي كلو من لبنان بس آخر كم اسبوع زبطتها شوي

ليش جوائز التوب 5 صارت مملة ومكررة وحتى ان الكل صار بيتوقعا قبل ما تطلع ... كانت كل سنة تعمل شي جديد وتقدم مفاجآت حلوة

ليش بأول السنة وعدت بشغلات وكذبت وهيي من الاول مو مضطرة تقول عليها
بتذكروا بأول أسبوع وعدت بانها رح تعمل صف جديد لتعليم كيفية التلحين وصناعة الميكسات والدي جي وهيك شغلات وما وفت بوعدها

كمان قالت انها ضافت غرفة للمساج وما فتحتها
وكمان قالت انه ضافت لوح تزلج ما بعرف شو اسمو وما شفناه أبدا

ليش ما ضافت فقرة جديدة عالبرايمات متل كل سنة بالعكس السنة نقصوا الفقرات ونقص تقريبا كتير شغلات حلوة

_____________________________________

ثياب الطلاب ::

بعتقد انه السنة ما كانوا مميزين أبدا حتى فساتين البنات كانوا مكررين مع تغيير بالألوان ومافي شي جديد
___________________________________

عنجد السنة الموسم السادس كتير كتير غريب صارت شغلات مو معقولة يعني بدل ما تسعي ادارة الاكاديمية للتأكيد على استمرار نجاحة كانوا عم يحاولوا يثبتوا فشله

وما حدا يقول انه نقص بالتمويل لان كلنا شفنا ان السنة اجا جمهور عالمسرح وتصويت قوي وهدايا مالية كبيرة كتير كتير كتير ما صارت من قبل للطلاب

لازم تفسير من ادارة الأكاديمية ..لازم اذا بدهم يعملوا موسم جديد يكسبوا ثقة الناس أكتر لان كتير خسروا ناس متابعين .... أنا بحب ستاراك ولازم هالبرنامج يستعيد مكانته
______________________________

الايجابيات رغم قلتها :::::

1- الطلاب كانوا مميزين كتير برأيي اكتر من المواسم السابقة لان الكل كان عنده شي قوي يعطيه::

محمد باش :: فنان كامل متكامل صوت جديد واحساس رائع وبشهادة عدد كتير من النجوم

عبد العزيز :: خامة طربية مذهلة ودعم كبير وجمهور عريض ونجم اكيد ل 2009

بسمة بوسيل :: صوت يضاهي بقوته أغلب نجوم العرب ويتفوق على بعضهم وهيي ظاهرة أكيدة

ابراهيم دشتي :: خامة صوتية جديدة وقبول واسع عند الجمهور وقلب طيب وفيه أخلاق عربية رائعة

ميشيل قزي :: شكل جميل وصوت دافئ أنا متأكد من هون لسنتين انه رح يعمل أغنية وتنجح بشكل كبير

لارا اسكندر :: رغم صغر سنها فهي قادرة تقدم استعراض مسرحي متكامل وبأكتر من لغة وبكل ثقة

تانيا نمر :: رغم انها ما بتملك صوت قوي بس نحنا كلنا منعرف ان الشكل الجميل والدلع كافي ليعمل منها فنانة متل كتير من فنانات هالايام ومع التدريب والتحسينات بتطلع زابطة

يحيى صويص :: شب مميز وصوت جديد وخامة حلوة ووراه جمهور بيحبو من كل قلبو

ديالا عودة :: نجمة النجوم ... جامعة ستار أكاديمي وسوبر ستار فاكيد أنها نجمة 100%

آية عبد الرؤوف :: رغم الظلم ورغم أنف الاكاديمية فهي من أقوى أصوات ستاراك6 ما في تعليق عليها أبدا هيي جاهزة تماما للغناء باهم الحفلات

ناصر أبو لافي :: ظاااهرة جديدة ومستقبل قدامه

زاهر زرقاتي :: صوت يؤدي الاجنبي بشكل ملفت ومتكامل لا يقل أهمية عن نادر قيراط لكن لا نعرف لماذا لم يحظ بقبول أساتذة الاكاديمية وهل السبب ان نادر يكفي الآن للعرب

محمد سراج وناظم وميشيل رميح :: أصوات جميلة وبفرقة وحدة اذا عملوها أكيد بيضربو وبيكسرو الدنيا


متل ما شفتو ان الطلاب هني الشي المميز والايجابي الوحيد باكاديمية هي السنة رغم انهم انظلموا وما تقدملهم شي جديد ومميز يكتر جمهورهم من قبل الادارة متل المواسم السابقة
___________________________

أنا عنجد وبعرف ان فيه ملايين متلي بيحبو ستاراك وبيتمنوا يرجع متل أول

اقتراحاتي لعودة ستاراك الى ما كان ::

1- ايقافه العام القادم

2- يعود بعد عامين بحلة جديدة كاملة من (( مسرح وأكاديمية بديكور جديد + ااساتذة وصفوف جداد + شركات راعية قوية وقادرة على التمويل الضخم ++ مصداقية أكثر وشفافية بالتصويت ++ السماح لمحطات اخرى كروتانا - الجرس - محطات محلية مشهورة لبلدان الطلاب بالتواجد على المسرح حرصا على انتشار أكبر ))

3- عقود عمل لآخر 8 طلاب تتعهد بانتاج اغنية خلال عامين وللأول بانتاج ألبوم كامل وفيديو كليب

4- اعادة التورنيه من خلال المشاركة الى جانب نجوم كبار في المهرجانات (( تونس :: قرطاج .. الأردن :: مهرجان الأدرن ... سوريا :: مهرجان المحبة أو مهرجان القلعة والوادي .... المغرب :: موازين أو غيره ... الكويت :: هلا فبراير ... مصر :: حفلات شرم الشيخ أو غيرها.... الامارات قطر البحرين وغيرها )) طبعا الى جانب نجوم كبار وذلك لضمان الحضور الجماهيري تحقيقا لانتشار أوسع

5- ان يكون البرنامج كل سنتين وليس كل سنة


عذرا على الاطالة بتمنى ما كون نسيت شي يلااا شو رايكم انتوا قولوا شو تعليقاتكم وشكرا

يسلموو كتير ميرنا على الفكرة الرائعة

بالنسبة الي اهم شي اتعرفنا على شخصيات كتير رائعة ومن بلدان مختلفة ومواهب رائعة

واتعرفنا على شخصية كل واحد على طبيعته بما انه كان في كاميرات

وبصراحة انا معك بكل كلمة قلتيها وماعندي اي زيادة على الحكي اللي قلتيه يعني باختصار كفيتي ووفيتي

شكرررررررررا ع الموضوع